قصيدة في مثل هذا اليوم للشاعر سعيد شحاتة

قصيدة في مثل هذا اليوم للشاعر سعيد شحاتة

يا نهار عمّال بتمدّ إيديك باليوم الجاي

يا امّ الفدادين طارحين نعناع ودماغ نسّاي
أوّل ما لمحت العود الزان حسّيتك ناي
ووقفت اسأل..
يا ولاد الإيه
عملوكي إزاي؟
لو كنت اعرف…
كنت عملت اتناشر واحده
وكباية شاي

………..

لو تسألي عن قلبي…
قلبي كلام وتوت وحمام
وعيوني لما بتبتسم روحك لوشّ الورد بتشوفك منام
وإيديا لو سلمتي بتبوس بعضها
وعنيكي لو صلّيت بتتقدّم إمام
لابس هدوم إحرامي في رحابك مريد
وسعيد إذا روحك رَوَت روحي بسلام
صايم وعطشان للدفا وشبعان وجع
وف نفسي اشقّ بضحتك عطش الصيام
ماسك ضلوعي بإيدي ومتبّت قوي
وكأنّي ماشي ف حضرتك شايل وسام
أرجوكي صوتي ما عادش قادر ع البكا
وعنيّا مش قادرين على كسر الخصام
فما تجبريش درويش يبيع روحك سبح
وما ترغميش طفلك على مرّ الفطام

حافي على الألغام ومش حاسس بخوف

والقلب رغم الضلمه بيحاول يشوف

ماشيه السيوف جوايا بتحارب سيوف

عمّال باطوف الأرض واتغرّب

ساكت كأنّي شراع بيتجرّب

إيد السما ع الأرض بتقرّب

والنور في نن عنيكي بيحرّب خيوطه ويتغزل موضوع

وجعك في عزّ الخوف بيوجعني
ما اعرفش هأكتب إيه وانا موجوع
الكلمه مانعاني إني أقف ساكت
والصرخه أعلى من الشبع والجوع
وجعك واجعني وقلبي بيعافر
صدق اللي قال انّ الوجع كافر
طاب يعمل ايه سلطانك الظّافر
والورد في رحاب الألم ممنوع؟!

يا فرحة المجموع بصوت الريح

تفاريح عيونك والرموش مراجيح

أنا قلب دارج وأنتي قلب فصيح

تايه كأنّي مسيح على الصلبان

بانده ومش سامع سوى الغربان

وانا شعري كلّه صريح ومش خجلان

باوصف عنب واكواز دره ورمّان

 وارقص على كتف الزمان الزّين

مرّت سنه من عمرنا ف بوستين

فاكرين وعاملين روحنا مش فاكرين

في مثلِ هذا اليَوْم..  كنا كويسين

والحمد لله يا حبيبتي..

ما زلنا برضه كويسين

بتموت سنين م العمر..

وتعجّز سنين

وانا وانتي في عيون بعض..

 لسّه صُغَنّنين

طفلين بيضحك قلبهم للصبح من غير افتعال

وبيرسموا قبة سما ويغنوا للنور الحلال

وبيبدروا الشعر ارتجال يطرح قلوب

وانا باعشقك رغم اتزان الروح مانيش عارف أتوب

ولا قادر أتجنن

.. وكأنّي طير بنيّه بيبنّن

عيّل في حجرك لسّه بيسنن

درويش وبيحنّن بشر تايهين

السكّه صعبه وسكّتك بساتين

وانا وانتي في عيون بعض ناس تانيين

غريبين وبيغنوا

لما الحياه بتروح بيستنّوا

يتمنّوا شجر السنط يطرح طير

ويفضفضوا للقِمري والشّرشِير

ياما نفسي أشيلك عود نهار طارح

 وارمح مع العصافير من امبارح

وان تهت منّك اعود قمر جارح

وافضل معاكي العيّل السارح

شارح بعشقك معنى صنع الله

يسرقني قلبك.. واتسرق ويّاه

واحلم وراه واتنفسّك واسعى

واتأملّك يا ام العيون واسعه

واضحك واقول ما نتوش ولاد تسعه

مانتوش ولاد الحلم والحالمين

كل البنات من طلّتك خايفين

بيوشوشوا روحهم بقلب حزين

وبيسألوكي ودمعهم طوّاف

هتروحي فين من ربّنا
بعيونك الحلوين… وبرموشك
ورقّة خطوتك
وبجسمك الشفاف؟

أمّا أنا…
كل أما أشوفك نفسي أقول لك بأعشقك
لكن وعهد الله بأخاف
يا أم الشفايف وردتين..
فاتح في قلبي الضلفتين
ويمين شمال وشمال يمين
والقلب مُجهد م الطواف
يا شاربه وش الروح حليب
ومشرّباني العمر حاف
يا شمس ماشيه تقول لخلق الله
يا ناس مين اللي سمّى ف طلّتي
ومين اللي شاف؟
هتروحي فين من ربّنا
بخدودك القمرين
وبضلوعي الضعاف؟
ولامتى هأفضل فوق طريقك سيف بلا سيّاف
مذنب بيشحت منّك الإنصاف؟
وإزاي هأكمّل عمري من غيرك
بأحلامي العجاف
الفرحه من غيرك وجع
.. والضحك من غيرك وجع
والآهه من غير الوجع بتكون وجع
والحزن من غيرك في عز العشق فوق الروح لحاف
أنا نفسي أقول لك بأعشقك
لكن وعهد الله بأخاف
وقت اختطاف الحلم م النايمين

في مثلِ هذا اليَوْم..  كنا كويسين

والحمد لله يا حبيبتي..

ما زلنا برضه كويسين

شارك المقالة عبر

تعليقات القراء

أضف تعليق

من فضلك ادخل تعليقك
من فضلك ادخل اسمك هنا

تابع صفحتنا على فيسبوك

لأحدث أخبار فعاليات وندوات بيت الشعر بالأقصر

أحدث أنشطة البيت

أحدث المقالات

شعراء البيت

إنضم الى القائمة البريدية

إشترك في القائمة البريدية لبيت الشعر بالأقصر لتصلك أحدث الأخبار و المقالات عبر البريد الإلكتروني

الكلمات الدلالية الأكثر بحثا

spot_img