علاقة مفتوحة

لو كان هواكى قدر

فانا مسموح لى أعد النجوم

اللى فى فستانك

وما اغلطشى

واخبى الليل ورا ضهرى

ويكون لقاكى فرض

زى الصلا والصوم

وان هاج فى يوم بحرك

ح اتعلم عشانه العوم

وارضى بهجرك فى الخريف

اللى اتمحى من بين فصول العام

واعلم الناس الهوى

ويكون معاى وحدى

مفاتيح بيبان الجنه

وبايدى وحدى يدخلوها العاشقين

واخلق عشانك دنيا تانيه

تانيه خالص

مافيهاش فراق .. ولا حزن

ان كان هواكى قدر .. ح اكون عصفور

تشوفيه بيغنى وحيد

على كل غصن

لو كان هواكى قدر

ح امشّى الغيم على كيفى

وادارى الشمس بكفوفى

واخلى الخلق تحلم بيكى

نور طالع بينشد ..

من صدى روحى

واغنى لك كمان موال

يعيد تشكيل حروف

الاسم والمعنى

ومين معنا

سوى لحنى اللى فى المغنى

باحساسى

أدوب لك جبال الخوف

واعمل من هواى كعبه

ومن كل البلاد تيجى قلوب عاشقه

يصلوا فيها بعد الطوف

ولو كان الهوى قدرى

ح اغمض عينى واسلم

وابّطل اشوف

قصيدة أخرى للشاعر

https://luxorph.com/%d8%a7%d9%84%d8%b4%d8%a7%d8%b9%d8%b1-%d8%a8%d9%83%d8%b1%d9%8a-%d8%b9%d8%a8%d8%af-%d8%a7%d9%84%d8%ad%d9%85%d9%8a%d8%af/