قصيدة آخر صلاة
آخر صلاة ف بيت ربنا
فنعشي كنت انا الامام
سامع بكا شبه البكا
شايف دموع كده والسلام
والحزن واقف فالصفوف
عمال يقول سدو الفرج
خلو القدم جنب القدم
وانا لسه هبكي مالندم..
راحو الحبايب سلموا قبل الامام
سَبل يا والدي وابكي حالي
شق توبك قول يا واد.. أمر الإلاه
واني الفك فالكفن ده أمر عالي
الموت علينا دين وحق لكن فراق الاهل غالي
وانتي يا اما هاتي شاشي حزمي الجرح القديم
وابكي علي شاب فحياته كان فغربه
واما مات اصبح نديم
حِلي شعرك ده اللي عمري ماشفتهوش
دوري علي وشي من بين الوشوش
زيدي نواحك عالضنا يمكن تحنله النعوش
يا صاحبي ياللي فرحلتي ونسني بحكاوي السكوت
كان نفسي احضن مره اخويه
لوكان يجوز عندك ياموت
اني اقبل راس ابويه
يمكن تطول بينا السنين
طب حتي يد امي اليمين
طب نظره علي بيت الجيران
لما انت ناوي عالرحيل
ياخي ليه ماقلتش من زمان
للبعد بتحن الخطاوي
بس مش بالشكل ده بس مش بالبعد ده
ولا عمري جربت السفر
جوه الكفن !…
كان ضروري تجيب معاك اي واحد
من بلاد الميتين …
يحكيلي عن عيشة هناك
ايه هناكل ايه هنشرب
وازاي هنام من غير غطا
والفرش طين
وبـ ايه هجاوب عالملاك
يا حرقة القلب الي ذنبه
خلي نبضه يقول آهات
ياتوهة الفكر اللي كان
فاكر حياته مكمله
وضل الصراط…
(اقرأ كتابك ياعبدي علي مهلك)
ياروح يامفارقه بندهلــــــــــك
سطور خيري دي معدوده
وكله من صنيع جهلك
بس اخشعي فآخر صلاه
وانا مش كيان ولا محتوي
حاجه كده شبه العدم
متفسروش ديه مجاهيل الحياه
والحبكه مطلوبه هنا
آخر مشاهد فالروايه
والستاره هتتقفل ولا فيش رجوع
كان مشهد الدفنه الأخير
يومها اخد سوكسيه دمـــــــــوع
حيي الجماهير الغفيره
وانحني من جوه لحـــدك
حيي وحــــــــــــــــــدك
ولا فيشي تاني عرض قادم
يا اما بنـــــــــــــــــــــــادم
بطلتي ليه يا اما البكا
زيدي نواحك كتري اليوم الأهات
مش سامعه قال انا هتدفن
وقال خلاص انا يا اما مات
واوعي تنسي…!
تكوي قمصاني الجديده
اللي انا ما لبستهم
لو مره تشتاقي لضناكي
هينفعوكــــــــــــي
اتخيليني فشكلهم
وولاد اخويه اللي بكوا
ولا يدركوش ان اللي مات
ده عمهــــــــم
احكي ليهم عني ولكل الحبايب
قولي ولدي كان حنين
قولي كنا نزعله ولا كان يبين
قولي كانت ضحكته تقتل
لياليه الحزينه
قولي كانت طلته
تشبه البيت الجديد بهجه وزينه
قولي ولدي ياناس مماتش
هي غيبه وبكره يرجع كل غـــــــــايــب…
قصيدة أخرى للشاعر
https://luxorph.com/%d8%a7%d9%84%d8%b4%d8%a7%d8%b9%d8%b1-%d8%ad%d8%a7%d9%85%d8%af-%d8%b9%d8%a7%d9%85%d8%b1/
