قصيدة آخر الملكات للشاعر حسين سعيد

أنا بطّلت أقول لك ليه وعايز إيه
ومين مضايقني في العالم
ومين علّمني أفرح بيه
وامتى الدنيا تتحول
لسرّ كبير أقف مداريه
أنا بطّلت أقول لك باعشق الغربه
وبطّلت أشربك مواويل من القربه
وبطلت أبتسم في عيونك الهربانه م الأيام
أنا بطّلت أروح لحبايبي في الأحلام

عرفتك بس مش عارف
عرفتك ليه وشُفتك فين

في روحك حاجه مش مفهومه

  وسط جناين الياسمين

يا عين دايمًا باشوف بيها اللي مش شايفاه عنيّا الجوز

أنا شخص اتولد زيّك في حضنك واللا أنا أراجوز

وعايز أقول كلام فارق عشانك واللا رافض أعوز

جناينك طارحه ضيّ شفيف وسكّر واللا قشرة موز

يا عِزّة قلبك المعزوز في جيبي اللي انقسم لجيوب

أنا مغروز بقالي سنين هنا وما اعرفش منّي هروب

ما أنا لابسك كأنك توب
كأنّك أول الطالع وآخر حاجه في المكتوب
كأنّي ذنوب بتستغفر فتغفرها ف هواكي ذنوب
أنا قلبي صبح وياكي قدّ قلوب
بقى على قدّك المطلوب
وجايز لو أمرتيني

 أقول لك قلبي صار دبدوب
وأقول لك ناوي لما نتوب

.. نقول الكلمه بالمقلوب وأبوسك وَرد
وأدوس ع النار كأنّي بادوس تراب الأرض
وأردد وِرد روحي ف حضرتك أبيات
أنا اترددت قبلك ليه… وإيه جايبك من السماوات
وليه قلبك آيات نزلت على قلبي البريء بالذات
أنا عاشقك كأنّي -وليد بيعشق أمّ-
كأنّي وريد وحبّك دمّ
كأنّك سطر شعر جميل
كتبته بروح خليّة نحل
بعد ما نحلها حَمْحَم على الوردات وغنّى وشمّ
أنا  شاربك كأنّك يمّ للعطشان
كأنّك آخر الملكات وأنا السلطان
كأنّي سفينه والربّان عنيكي الطيّبه الدافيه
كأنّي بيتين في دفتر شعر وأنتي الصوره والقافيه
كأنّك ضحكتي الصافيه ف أراضي النور
كأنّك فرحه في عيون البنات الحور
كأنّي الشاعر المبهور بفنجان قلبك المسحور
كأنّي الضيّ وانتي ف ساعة الفجرية بدر بدور
أنا عاشقك وانا لمّا أتهبل واعشق -بأكون عصفور-
بأكون معذور إذا صمّمت واترجّيت عنيكي وصُمت
باكون شاعر إذا اتكمّمت
واكون أيتها شيء تاني إذا اتسحّب لساني في بقي واتكلّمت
أنا اتعلّمت ويّاكي إن أكون تاني
وأقف للريح إذا كانت معانداني
وادوس ع المستحيل والحلم لو أحلامي مانعاني
-أنا المجني عليه منّك- وأنا الجاني
وانا اللي الدنيا في رحابك ما زالت لسّه واحشاني
واحشني النوم على دراعك
واحشني الفرح فوق كتفك وطعم الخوف في أوجاعك
واحشني القلب لما القلب يصبح في الهوى شراعك
ولما بتمشي وتحاول جناين دنيتي تساعك
أنا تايه كأنّي مريد في أتباعك بعمّه وشال
كأنّي نهار غريب الشمس والأحوال
كأني سؤال مالوش إجابات مع الأندال

كإني ف ضحكتك خلخال وورد وتين

قصايد شِعرها يدوّخ بنات دايخين

جميع أشعاري من غيرك بلا مضامين
أنا داير كأنّي غريب بيحسب خطوة الفدادين

وبيحاول يغمّي عنيه إذا حس ببشر تانيين
كأنّك لما أتوه عنّك، شفايفك آخر العناوين
أنا حالف يمين الشمس ف عنيكي
يمين المرمر المجبر على إيديكي
كأنّي هانطلق فيكي
كأنّك قلتي مين ينفع فجادت بيّا غناويكي
ودلّتني عليكي بدون ما تدّيني الخريطه لقلبك النعناع
أنا مجبر يا بنت جنينة البنور وجاي م القاع
سألت الناس فدلّوني
وجريت لك والخطاوي وساع
سألت الحلم ف ضلوعك
فكان العشق بالإجماع
وحاسس لمّا حبّيتك بقلبي اوساع
وأصبح قدّ قرص الشمس والمعنى
بقى يساعنا
أنا قلبي صبح وياكي قدّ قلوب
بقى على قدّك المطلوب
وجايز لو أمرتيني.. أقول لك قلبي صار دبدوب
وبطّل لما علّمتيه… يحدّف في الحاجات بالطوب

يا كفّ قلوب بيحدف فرحه م الشبابيك

بتتشكّل قصايد نور بقمصان شيك

شارك المقالة عبر

تعليقات القراء

أضف تعليق

من فضلك ادخل تعليقك
من فضلك ادخل اسمك هنا

تابع صفحتنا على فيسبوك

لأحدث أخبار فعاليات وندوات بيت الشعر بالأقصر

أحدث أنشطة البيت

أحدث المقالات

شعراء البيت

إنضم الى القائمة البريدية

إشترك في القائمة البريدية لبيت الشعر بالأقصر لتصلك أحدث الأخبار و المقالات عبر البريد الإلكتروني

الكلمات الدلالية الأكثر بحثا

spot_img